ഇവിടെ ഒരു പുഴയുണ്ടായിരുന്നു

അറ്റമില്ലാത്ത മണൽപ്പരപ്പിനു നടുവിൽ,

അവന്റെ  കൈ പിടിച്ച് അവൾ പറഞ്ഞു- 

"ഇവിടെ ഒരു പുഴയുണ്ടായിരുന്നു...

എന്റെ ബാല്യ- കൌമാരങ്ങളുടെ             കടലാസ്സു വഞ്ചികൾ  ഒഴുകിയകന്ന പുഴ;

ഒരുമിച്ചു നീന്തിയ ദൂരങ്ങൾ കൊണ്ട് ആഴം അളക്കപ്പെടാത്ത ആത്മബന്ധത്തിന്റെ പുഴ;

വർണ്ണ-വർഗ്ഗങ്ങൾ തീർത്ത അതിരുകൾ

മുറിച്ചൊഴുകിയ സ്നേഹബന്ധത്തിന്റെ പുഴ."

അവന്റെ അവിശ്വാസം ചുഴിയുന്ന നോട്ടം      ഗൗനിക്കാതെ അവൾ വീണ്ടും പറഞ്ഞു- 

"ഇവിടെ ഒരു പുഴയുണ്ടായിരുന്നു..

ആ  പുഴയിലൂടെ,

നീ എന്നിലേക്കും 

ഞാൻ നിന്നിലേക്കും 

നീന്തിയ  ദൂരം 

നാമൊരുമിച്ചു നീന്തിയതിലുമേറെയാണ്"

അന്നേരം, 

അവളുടെ കവിളിലൂടെ ഒലിച്ചിറങ്ങിയ കണ്ണീരിൽ, 

ആ പുഴ കര കവിഞ്ഞൊഴുകുന്നത് 

അവൻ കണ്ടു.