ഫാസിസം

ചരിത്ര പാഠപുസ്തകത്തിലാണ്

ഈ വാക്ക് ആദ്യമായി കണ്ടത്

കാഴ്ച്ചയിൽ പലഹാരം പോലെ മധുരിച്ചു;

പക്ഷെ ആശയത്താൽ മുറിവേൽപ്പിച്ചു.

മൊട്ടത്തലയും മുറിമീശയും  

ഉള്ളിലെ പേടിപ്പട്ടിക പെരുക്കി.

ഇറ്റലിയിലേയും ജർമനിയിലേയും 

''രോഗാതുരർ' ഉള്ളുരുക്കി.

ഒടുവിലാ തൊള്ളായിരത്തിനാപ്പത്തഞ്ചിൽ* 

ലോകം രോഗവിമുക്തമായെന്ന് വിശ്വസിച്ചാശ്വസിച്ചു.

പതിറ്റാണ്ടുകൾക്കിപ്പുറം,

വിശ്വാസങ്ങളൊക്കെ തെറ്റിയെന്ന്

കാലം തിരുത്തുന്നു.

വെളളവും വളവും ആവോളം വലിച്ചെടുത്ത് രോഗബീജം വളരുന്നതിദ്രുതം.

നിരോധനങ്ങൾ നിയന്ത്രണങ്ങൾ                          ആൾക്കൂട്ട വിധി പ്രഖ്യാപനങ്ങൾ

ബിംബവൽക്കരിക്കപ്പെട്ട ദേശീയത

ഭരണഘടനയുടെ കഴുക്കോലൂരി-

പ്പണിയുന്ന രക്തശുദ്ധിയുടെ പട്ടിക

ചോദിക്കുന്നവന് ദേശദ്രോഹിച്ചാപ്പ. 

രോഗലക്ഷണങ്ങൾ പടരുന്നു ബഹുദൂരം.

കറുത്ത കാലത്തെ വായിച്ചറിഞ്ഞവർ,

ജീവിതത്തെ തൊട്ടറിഞ്ഞവർ,

തലയിലിനിയും ഇരുൾ പരക്കാത്ത ചിലർ -

തെരുവിലിറങ്ങുന്നു, 

കൈകൾ കോർക്കുന്നു,

വരി നിൽക്കുന്നു,

മതിലുകളാകുന്നു 

എഴുതുന്നു,വരയുന്നു,പറയുന്നു

,ആടുന്നു,പാടുന്നു,കൊട്ടുന്നു

കാരണം,

ചികിത്സയേക്കാൾ നല്ലത് പ്രതിരോധമല്ലോ.